隔牆有耳：工運玩創意拍片寫詩訴心事

扎鐵工人同空中小姐，一個出名man、一個出名靚；扎鐵工3年前大熱天時赤住膊、隊住啤，罷工罷足36日，爭取到日薪加10蚊；「最美麗工會」17年前寒冬下食住風遊行去港督府外露宿，罷工17日。兩個工會唔單止團結，而且都好鍾意創作，前者出咗個扎鐵詩人冼祥，一首「減薪加時何曾了，人工奀又少」，道出扎鐵工心聲，後者有創作人LeeDee嘅邵子風相助，rap出《惡晒航空》空服辛酸，一樣打動人心。

冠軍獎金三千蚊

一直推動工運嘅職工盟同街工，今年齊齊鼓勵創作賀生日，慶祝20周年嘅工盟搵邵子風拍埋《惡晒航空》MV，實行唱爆空姐、空少工作寃屈，又用「谷到爆」同「撐到底」做主題，呼籲打工仔女拍短片參賽，講吓付出半斤得唔到八両嘅故事，頭60個報名嘅可以參加月底舉行嘅工作坊，跟傳媒人區家麟同埋《鏗鏘集》資深編導潘達培上工作坊學吓嘢，冠軍仲有3,000蚊獎金o架。

除咗創作比賽，工盟仲會出版工運書同埋搞工運講座，10月24、25號就會有首屆香港工人節，有飲食業嘅兄弟姊妹會示範整點心，想感染吓扎鐵工人嘅男人味，又可以睇搭棚、扎鐵示範。

比工盟仲要大5歲嘅街工，前身係新青學社，30年前舉辦過嘅一屆工人文學獎，搞得幾屆就摺埋，今年賀25周年，決定重新舉辦，除咗新詩、散文、小說之後，又與時並進加入埋攝影同埋錄像項目，等潮仔潮女都可以參加，評判陣容相當鼎盛，詩歌組有鄧阿藍、飲江同陳智德，錄像短片組有莫昭如、麥海珊同埋名導演許鞍華，每組冠軍都有3,000蚊獎金。

工盟嘅李卓人同街工梁耀忠都話，希望呢啲活動可以鼓勵吓啲工人發聲，激起大眾關心工人處境，阿人對於工運前景好樂觀，佢話舊年加入工會嘅新成員，8成係後生仔，希望呢類比賽吸引多啲年輕人撐工運。想知道多啲活動詳情，可以去職工盟網址 http://www.hkctu.org.hk同街工網址http://www.nwsc.org.hk/workerlit睇睇。

李八方
蘋果日報　2010-07-05